എല്ലാദിവസവും നക്ഷത്രഫലം നിങ്ങളുടെ മൊബൈല്‍ഫോണില്‍ ലഭിക്കാന്‍ ഇപ്പോള്‍തന്നെ ജോയിന്‍ ചെയ്യൂ ജ്യോതിഷവാര്‍ത്തയുടെ വാട്ട്‌സാപ്പ് ചാനലില്‍. ഇവിടെ ക്ലിക്ക് ചെയ്യൂ.

ഇന്നത്തെ കാലത്ത് മൊബൈല്‍ ഫോണ്‍ എന്നത് വെറുമൊരു സംസാരിക്കാനുള്ള ഉപകരണം മാത്രമല്ല. നമ്മുടെ വ്യക്തിപരവും തൊഴില്‍പരവുമായ ജീവിതത്തിന്റെ നിയന്ത്രണ കേന്ദ്രമായി അത് മാറിക്കഴിഞ്ഞു. ഉപഭോക്താക്കളുടെ കോളുകള്‍, പുതിയ ബിസിനസ്സ് അവസരങ്ങള്‍, ജോലിസ്ഥലത്തെ നിര്‍ദ്ദേശങ്ങള്‍, സാമ്പത്തിക ഇടപാടുകള്‍, കുടുംബ ബന്ധങ്ങള്‍ എന്നിവയെല്ലാം ഇന്ന് ഫോണിലൂടെയാണ് നടക്കുന്നത്. ഒരു തരത്തില്‍ പറഞ്ഞാല്‍, അവസരങ്ങളും ആശയവിനിമയങ്ങളും ഏകോപിപ്പിക്കുന്ന ഒരു ‘ഡിജിറ്റല്‍ ലക്ക് ആക്‌സിലറേറ്റര്‍’ (Digital Luck Accelerator) ആണ് നമ്മുടെ ഫോണ്‍.

എന്നാല്‍ പഴയ ചിത്രങ്ങള്‍, ഉപയോഗിക്കാത്ത ആപ്പുകള്‍, മറന്നുപോയ നമ്പറുകള്‍, മറുപടി നല്‍കാത്ത സന്ദേശങ്ങള്‍ എന്നിവ നിറഞ്ഞിരിക്കുമ്പോള്‍, ഫോണ്‍ നമ്മുടെ ഭൂതകാലത്തിന്റെ ഭാരവും ചുമക്കുന്നു. 2026 സെപ്റ്റംബര്‍ മാസം ഈ ഭാരം ഒഴിവാക്കാനും പുതിയ ഊര്‍ജ്ജം കൈവരിക്കാനും അനുയോജ്യമായ സമയമാണ്.

2026 സെപ്റ്റംബറില്‍ ഫോണില്‍ മാറ്റങ്ങള്‍ വരുത്തേണ്ടത് എന്തുകൊണ്ട്?

ജ്യോതിഷപരമായ കാരണം: സെപ്റ്റംബര്‍ മാസത്തിന്റെ തുടക്കത്തില്‍ സൂര്യനും കേതുവും ചിങ്ങം രാശിയില്‍ ഒന്നിച്ചു നിലകൊള്ളുന്നു. ഇത് പഴയ തിരിച്ചറിയലുകളിലേക്കും ആവശ്യത്തിലധികം നമ്മള്‍ മുറുകെപ്പിടിച്ചിരിക്കുന്ന പഴയ കാര്യങ്ങളിലേക്കും ശ്രദ്ധ ക്ഷണിക്കുന്നു. സെപ്റ്റംബര്‍ പകുതിയോടെ സൂര്യന്‍ കന്നി രാശിയിലേക്ക് കടക്കുമ്പോള്‍ കാര്യങ്ങള്‍ തരംതിരിക്കാനും തെറ്റുകള്‍ തിരുത്താനും കാര്യങ്ങള്‍ ശരിയായ സ്ഥാനത്ത് ക്രമീകരിക്കാനുമുള്ള പ്രായോഗിക ചിന്ത വരുന്നു.

സംഖ്യാശാസ്ത്രപരമായ കാരണം: സെപ്റ്റംബര്‍ ഒന്‍പതാം മാസമാണ്. സംഖ്യാശാസ്ത്രത്തില്‍ 9 എന്ന സംഖ്യ പൂര്‍ത്തീകരണത്തെ (Completion) സൂചിപ്പിക്കുന്നു. കൂടാതെ, 2026 എന്ന വര്‍ഷത്തിന്റെ കൂട്ടുതുക 1 ആണ് (2+0+2+6 = 10 > 1+0 = 1). 1 എന്ന സംഖ്യ പുതിയ തുടക്കത്തെ (Fresh Beginning) പ്രതിനിധീകരിക്കുന്നു.

അതുകൊണ്ട്, ലക്ഷ്യം പൂര്‍ത്തിയായ പഴയ കാര്യങ്ങള്‍ ഒഴിവാക്കി പുതിയ അവസരങ്ങള്‍ക്കായി വഴി തുറക്കുക എന്നതാണ് ഈ മാസത്തിന്റെ സന്ദേശം.

ഈ മാസം പിന്തുടരാവുന്ന 2 പ്രധാന മാറ്റങ്ങള്‍:

1. ഡിജിറ്റല്‍ മാലിന്യങ്ങള്‍ നീക്കം ചെയ്യുക (Declutter Your Phone)

മാസങ്ങളായി ഉപയോഗിക്കാത്ത ആപ്പുകള്‍ ഫോണില്‍ നിന്ന് നീക്കം ചെയ്യുക.
ഒരേപോലെയുള്ള ചിത്രങ്ങള്‍ (Duplicate photos), അനാവശ്യ സ്‌ക്രീന്‍ഷോട്ടുകള്‍, പഴയ ഡൗണ്‍ലോഡുകള്‍, പ്രൊമോഷണല്‍ മെസ്സേജുകള്‍ എന്നിവ ഡിലീറ്റ് ചെയ്യുക.
അനാവശ്യ വാട്ട്സ്ആപ്പ് ഗ്രൂപ്പുകളില്‍ നിന്ന് പുറത്തുകടക്കുക; ശല്യപ്പെടുത്തുന്ന ഗ്രൂപ്പുകള്‍ മ്യൂട്ട് ചെയ്യുക.
കോണ്‍ടാക്റ്റ് ലിസ്റ്റ് പരിശോധിച്ച് പ്രയോജനമില്ലാത്തതോ അസ്വസ്ഥത ഉണ്ടാക്കുന്നതോ ആയ പഴയ നമ്പറുകള്‍ നീക്കം ചെയ്യുക.
അനാവശ്യമായ ഡിജിറ്റല്‍ ഭാരം കുറയ്ക്കുന്നത് മാനസിക അസ്വസ്ഥതകള്‍ കുറയ്ക്കാനും പ്രധാനപ്പെട്ട കാര്യങ്ങളില്‍ ശ്രദ്ധ കേന്ദ്രീകരിക്കാനും സഹായിക്കും.

2. വാള്‍പേപ്പര്‍ മാറ്റി ‘റീസെറ്റ്’ ചെയ്യുക (Change Your Mobile Screen)

ദിവസത്തില്‍ നൂറുകണക്കിന് തവണ നമ്മള്‍ ഫോണ്‍ സ്‌ക്രീനിലേക്ക് നോക്കുന്നുണ്ട്. നമ്മള്‍ ബോധപൂര്‍വ്വം ശ്രദ്ധിച്ചില്ലെങ്കിലും വാള്‍പേപ്പര്‍ നമ്മുടെ മനസ്സിനെ സ്വാധീനിക്കുന്നു.
പഴയ ബന്ധങ്ങളുമായോ പരാജയപ്പെട്ട പദ്ധതികളുമായോ ബന്ധപ്പെട്ട ചിത്രങ്ങളാണ് വാള്‍പേപ്പറെങ്കില്‍ ഈ മാസം അത് മാറ്റുക.
നിങ്ങളുടെ ഭാവി ലക്ഷ്യങ്ങളെ തൊഴില്‍പരമായ വളര്‍ച്ച, സാമ്പത്തിക ഭദ്രത, മാനസിക സമാധാനം, നല്ല ആരോഗ്യം, പുതിയ തുടക്കം എന്നിവയെ പ്രതിനിധീകരിക്കുന്ന ചിത്രം വാള്‍പേപ്പറാക്കുക.
ഹോം സ്‌ക്രീനില്‍ വളരെയധികം ആപ്പ് ഐക്കണുകള്‍ നിറച്ചു വയ്ക്കാതെ വൃത്തിയായി സൂക്ഷിക്കുക.

ഉപസംഹാരം

ഫോണിന് സ്വയം ഭാഗ്യം നിര്‍മ്മിക്കാന്‍ കഴിയില്ല, എന്നാല്‍ നമ്മുടെ ശ്രദ്ധയേയും ഊര്‍ജ്ജത്തെയും ശരിയായ രീതിയില്‍ തിരിച്ചുവിടാന്‍ അതിന് കഴിയും. 2026 സെപ്റ്റംബറില്‍ നിങ്ങളുടെ തൊഴിലിടമോ പേഴ്‌സോ വൃത്തിയാക്കുന്നത് പോലെ ഈ ഡിജിറ്റല്‍ ഉപകരണത്തിനും അല്പം ശ്രദ്ധ നല്‍കൂ!

തയാറാക്കിയത്: സിദ്ധാര്‍ഥ് എസ്. കുമാര്‍ (കടപ്പാട്: TOI)