കൊടുങ്ങല്ലൂര്‍: കൊടുങ്ങല്ലൂര്‍ ശ്രീവിദ്യാപ്രതിഷ്ഠാനത്തിന്റെ ആഭിമുഖ്യത്തില്‍ ശൃംഗപുരം മഹാദേവ ക്ഷേത്രത്തിനു സമീപത്തുള്ള കോവിലകം ഊട്ടുപുര കോമ്പൗണ്ടില്‍ ഡിസംബര്‍ 12, 13, 14 തീയതികളിലായി നടക്കുന്ന ശ്രീവിദ്യാ സപര്യാമഹോത്സവത്തിന് ഒരുക്കങ്ങള്‍ പൂര്‍ത്തിയായി.

യജ്ഞ ശാലയുടെ കാല്‍നാട്ടു കര്‍മ്മം സന്യാസി കൃഷ്ണയോഗം നിര്‍വഹിച്ചു. തുടര്‍ന്ന് നടന്ന വിശദീകരണ യോഗത്തില്‍, ശ്രീവിദ്യാ പ്രതിഷ്ഠാനത്തിന്റെ ചെയര്‍മാനും കൊടുങ്ങല്ലൂര്‍ ഭഗവതിക്ഷേത്രത്തിലെ പാരമ്പര്യ മേല്‍ശാന്തിയുമായ അഡ്വക്കേറ്റ് ത്രിവിക്രമന്‍ അടികള്‍ യാഗത്തിന്റെ ക്രിയകളെക്കുറിച്ച് വിശദീകരിച്ചു.

വിവേകാനന്ദകേന്ദ്രം അഡ്മിനിസ്‌ട്രേറ്റര്‍ സുധാകര്‍ , ജനം ടിവി എം.ഡി. സജീവന്‍ പറപറമ്പില്‍, എസ്.എന്‍.ഡി.പി താലൂക്ക് പ്രസിഡണ്ട് രവീന്ദ്രന്‍, കോവിലകം പ്രതിനിധി സുരേന്ദ്രവര്‍മ്മ രാജ തുടങ്ങിയവര്‍ വിശദീകരണ യോഗത്തില്‍ സംസാരിച്ചു.

ശ്രീവിദ്യാ കുല ഭൂഷണം, ശ്രീവിദ്യാ തന്ത്രരത്‌നം ഗുരുജി തഞ്ചാവൂര്‍ ഗണപതി സുബ്രഹ്‌മണ്യ ശാസ്ത്രികള്‍ ആണ് മുഖ്യ യജ്ഞാചാര്യന്‍.

ഹിമാലയത്തില്‍ നിന്നുള്ള അഘോരി മാ ശിവാനി ദുര്‍ഗ്ഗ, മഹാമണ്ഡലേശ്വര്‍ സ്വാമി ആനന്ദവനം ഭാരതി (ജൂന അഖാഡ), സ്വാമി ചിന്മയാനന്ദ സരസ്വതി (കര്‍ണാടക), ശ്രീ. ശങ്കര്‍ സ്വാമിജി (തെലുങ്കാന) എന്നിവര്‍ക്കൊപ്പം കേരളത്തിനകത്തുനിന്നും പുറത്തുനിന്നുമുള്ള നിരവധി ആചാര്യന്മാരും സ്വാമിമാരും ശ്രീവിദ്യോപാസകരും ചടങ്ങുകളില്‍ പങ്കെടുക്കും.

ഡിസംബര്‍ 12: വൈകുന്നേരം നാലുമണിക്ക് ഗുരുജി തഞ്ചാവൂര്‍ ഗണപതി സുബ്രഹ്‌മണ്യ ശാസ്ത്രികളുടെ മുഖ്യ കാര്‍മികത്വത്തില്‍ ദേവീ മഹാത്മ്യം സമ്പൂര്‍ണ്ണ പാരായണവും ഉച്ഛിഷ്ട ഗണപതിഹോമവും നടക്കും.

ഡിസംബര്‍ 13: രാവിലെ വാഞ്ചകല്‍പ്പലതാ ഗണപതി ഹോമവും, ചണ്ഡികാ ഹോമവും നടക്കും. തുടര്‍ന്ന് മഹാമണ്ഡലേശ്വര്‍ സ്വാമി ആനന്ദവനം ഭാരതിയുടെ അനുഗ്രഹപ്രഭാഷണം. ഉച്ചതിരിഞ്ഞ് 3 മണിക്ക് ഗുരു പൂര്‍ണാനന്ദയുടെ പ്രഭാഷണവും നാലുമണിക്ക് അഘോരി മാതാജി ശിവാനി ദുര്‍ഗ്ഗയുടെ പ്രഭാഷണവും നടക്കും. വൈകുന്നേരം ആറുമണിക്ക് ശരഭ പ്രത്യംഗിരാ ഹോമം നടക്കും.

ഡിസംബര്‍ 14: രാവിലെ ലക്ഷ്മീ ഗണപതി ഹോമം, ശ്രീചക്ര നവാവരണ പൂജ, ഡോ. ഭൂവനേശ്വരി ടീച്ചറുടെ നവാവാരണ കീര്‍ത്തനം, ലളിതാസഹസ്രനാമപാരായണം, ദശമഹാ വിദ്യാ ദേവതാഹോമം എന്നിവ നടക്കും. 12 മണിയോടെ മഹാ പൂര്‍ണാഹുതിയും വസോര്‍ധാരയും നടക്കും. തുടര്‍ന്ന് പ്രസാദ വിതരണത്തോടെ ചടങ്ങുകള്‍ സമാപിക്കും.