മഹാവിഷ്ണുവിന്റെ അനുഗ്രഹം നേടിത്തരുന്ന ശ്രേഷ്ഠമായ ദിനങ്ങളിലൊന്നായ ശ്രാവണ പുത്രദാ ഏകാദശി ഈ വര്‍ഷം 2025 ഓഗസ്റ്റ് 5, ചൊവ്വാഴ്ച വരുന്നു. ശ്രാവണ മാസത്തിലെ ശുക്ലപക്ഷത്തില്‍ വരുന്ന ഈ ഏകാദശിക്ക് പവിത്ര ഏകാദശി എന്നും പേരുണ്ട്. പേര് സൂചിപ്പിക്കുന്നത് പോലെ, പുത്രന്മാരെ ആഗ്രഹിക്കുന്ന ദമ്പതികള്‍ക്ക് സന്താനസൗഭാഗ്യം നല്‍കുന്ന വ്രതമാണിത്. അതോടൊപ്പം, ഈ വ്രതം അനുഷ്ഠിക്കുന്നതിലൂടെ ചെയ്ത പാപങ്ങളില്‍ നിന്ന് മുക്തി നേടി മോക്ഷപ്രാപ്തി കൈവരിക്കാമെന്നും വിശ്വാസമുണ്ട്.

വ്രതത്തിന്റെ പ്രാധാന്യം

ഭവിഷ്യപുരാണത്തില്‍ ശ്രീകൃഷ്ണന്‍ യുധിഷ്ഠിര മഹാരാജാവിന് ഈ ഏകാദശിയുടെ മഹത്വം വിവരിച്ച് നല്‍കുന്നുണ്ട്. പുത്രലബ്ധിക്കായി ഈ വ്രതം അനുഷ്ഠിക്കുന്നതിന്റെ പ്രാധാന്യം ഇതില്‍ എടുത്തുപറയുന്നു. പൂര്‍ണ്ണമായ ഭക്തിയോടും സമര്‍പ്പണത്തോടും കൂടി ഈ വ്രതം നോല്‍ക്കുന്നവരുടെ ആഗ്രഹങ്ങള്‍ മഹാവിഷ്ണു സഫലമാക്കുമെന്നാണ് വിശ്വാസം.

ഏകാദശി ശുഭമുഹൂര്‍ത്തങ്ങള്‍

ഏകാദശി തിഥി ആരംഭം: 2025 ഓഗസ്റ്റ് 4, തിങ്കളാഴ്ച, രാവിലെ 11:42-ന്

ഏകാദശി തിഥി സമാപനം: 2025 ഓഗസ്റ്റ് 5, ചൊവ്വാഴ്ച, ഉച്ചയ്ക്ക് 01:12-ന്

വ്രതം അവസാനിപ്പിക്കേണ്ട സമയം (പാരണ): 2025 ഓഗസ്റ്റ് 6, ബുധനാഴ്ച, രാവിലെ 06:03 മുതല്‍ 08:39 വരെ.

വ്രതാനുഷ്ഠാനവും പൂജാവിധികളും

ദശമി ദിനം മുതല്‍ വ്രതം ആരംഭിക്കണം. ഈ ദിവസം ഒരിക്കലൂണ് സ്വീകരിച്ച് ലളിതമായ ഭക്ഷണം കഴിക്കാം.

ഏകാദശി ദിനത്തില്‍ പൂര്‍ണ്ണ ഉപവാസം അനുഷ്ഠിക്കുന്നതാണ് ഏറ്റവും ഉത്തമം. ആരോഗ്യപരമായ കാരണങ്ങളാല്‍ സാധിക്കാത്തവര്‍ക്ക് പാല്‍, പഴങ്ങള്‍ എന്നിവ കഴിച്ച് വ്രതം അനുഷ്ഠിക്കാം.

ദിവസം മുഴുവന്‍ ‘ഓം നമോ ഭഗവതേ വാസുദേവായ’ എന്ന മന്ത്രം ജപിക്കുന്നത് അത്യുത്തമമാണ്.

ഈ ദിവസം രാത്രി ഉറക്കമൊഴിഞ്ഞ് മഹാവിഷ്ണുവിനെ സ്തുതിച്ചുകൊണ്ട് ഭജനകളും കീര്‍ത്തനങ്ങളും ആലപിക്കുന്നത് പുണ്യകരമാണ്.
ഏകാദശി വ്രതം അവസാനിപ്പിക്കുന്നത് ദ്വാദശി തിഥിയിലെ പാരണ സമയത്താണ്. തുളസിയില ചേര്‍ത്ത തീര്‍ത്ഥം സേവിച്ച് വ്രതം മുറിക്കുന്നതാണ് ഉത്തമം.