കുറിച്ചിത്താനം പൂത്തൃക്കോവില്‍ ക്ഷേത്രത്തിലെ 148-ാമത് ഏകാദശിവിളക്ക് നവംബര്‍ 21ന്; 22ന് ആറാട്ട്
കുറിച്ചിത്താനം: ദക്ഷിണ ഗുരുവായൂര്‍ എന്നറിയപ്പെടുന്ന കോട്ടയം കുറിച്ചിത്താനം പൂത്തൃക്കോവില്‍ ക്ഷേത്രത്തിലെ ഈ വര്‍ഷത്തെ ഏകാദശി മഹോത്സവത്തിന് നവംബര്‍ 11ന് തുടക്കമാകും. നവംബര്‍ 22 വരെ നീളുന്ന ഉത്സവത്തിന്റെ പ്രധാന ചടങ്ങായ 148-ാമത് പൂത്തൃക്കോവില്‍ ഏകാദശിവിളക്ക് നവംബര്‍ 21ന് ആഘോഷിക്കും. ഭഗവാന് രുക്മിണീസമേതനായി അനുഗ്രഹം ചൊരിയുന്ന ക്ഷേത്രത്തില്‍ ഗുരുവായൂര്‍ ഏകാദശിയുടെ മഹത്വം വിളിച്ചോതുന്ന വിവിധ ആചാരാനുഷ്ഠാനങ്ങളും ക്ഷേത്രകലാപരിപാടികളും ഉത്സവത്തിന്റെ ഭാഗമായി നടക്കും.
കുചേലസദ്ഗതിയാണ് പൂത്തൃക്കോവിലിലെ ദേവസങ്കല്‍പം. പൗരാണികകാലം മുതല്‍ ഗുരുവായൂര്‍ ഏകാദശി വിശേഷദിനമായി ആചരിച്ചുവരുന്ന ക്ഷേത്രത്തില്‍ ഉത്സവബലി, നവകാഭിഷേകം, ചുറ്റുവിളക്ക്, ദീപാരാധന, കാഴ്ചശ്രീബലി, പള്ളിവേട്ട, ആറാട്ട് തുടങ്ങിയ ചടങ്ങുകള്‍ നടക്കും. ഗജവീരന്മാര്‍ അണിനിരക്കുന്ന കാഴ്ചശ്രീബലിയും താളവാദ്യങ്ങളുടെ അകമ്പടിയോടെയുള്ള ഘോഷയാത്രകളും ഉത്സവത്തിന് മിഴിവേകും.
നവംബര്‍ 11 മുതല്‍ വിവിധ ദിവസങ്ങളിലായി ദശാവതാര ചന്ദനം ചാര്‍ത്തല്‍, നവകാഭിഷേകം, ഉത്സവബലി, അഹസ്സ് വഴിപാട്, ചുറ്റുവിളക്ക്, ദീപാരാധന തുടങ്ങിയ ചടങ്ങുകള്‍ നടക്കും. നവംബര്‍ 15ന് സംഗീതോത്സവവും വിവിധ കലാപരിപാടികളും അരങ്ങേറും. പ്രശസ്ത സംഗീതജ്ഞരുടെയും വാദ്യകലാകാരന്മാരുടെയും പങ്കാളിത്തത്തോടെ നടക്കുന്ന പരിപാടികള്‍ ഉത്സവാഘോഷങ്ങള്‍ക്ക് കലാപരമായ മികവേകും.
നവംബര്‍ 21ന് ഏകാദശിദിനത്തില്‍ പുലര്‍ച്ചെ നാലിന് നിര്‍മാല്യദര്‍ശനത്തോടെ ചടങ്ങുകള്‍ ആരംഭിക്കും. തുടര്‍ന്ന് ഉത്സവച്ചടങ്ങുകള്‍, നവകാഭിഷേകം, പഞ്ചാരി മേളം, കാഴ്ചശ്രീബലി എന്നിവ നടക്കും. പൂത്തൃക്കോവില്‍ വാദ്യരത്‌ന അവാര്‍ഡ് ജേതാവ് തിരുമറയൂര്‍ ഗിരിജന്‍മാരാരും സംഘവും ഉള്‍പ്പെടെയുള്ള കലാകാരന്മാര്‍ മേളാവതരണങ്ങളില്‍ പങ്കെടുക്കും. രാവിലെ എട്ടിന് കലാവേദിയില്‍ പഞ്ചവാദ്യവും രാത്രി പള്ളിവേട്ടയും നടക്കും.
നവംബര്‍ 22ന് ആറാട്ടുമായി ബന്ധപ്പെട്ട ചടങ്ങുകള്‍ നടക്കും. ഗണപതി ക്ഷേത്രത്തിലെ തീര്‍ഥക്കുളത്തില്‍ ഭഗവാന് ജലാധിവാസം നടത്തുന്ന ചടങ്ങിനോടനുബന്ധിച്ച് താലപ്പൊലിയുടെയും വാദ്യഘോഷങ്ങളുടെയും അകമ്പടിയോടെ ഭഗവാനെ സ്വീകരിച്ചാനയിക്കും. തുടര്‍ന്ന് തിരുആറാട്ട് വിളക്കും മറ്റു ചടങ്ങുകളും നടക്കും. ആറാട്ടുവഴിയില്‍ നിറപറയും നിലവിളക്കും ദീപാലങ്കാരങ്ങളുമായി ഭക്തജനങ്ങള്‍ ഭഗവാനെ തിരുസന്നിധിയിലേക്ക് സ്വീകരിച്ചാനയിക്കും.
ഏകാദശി മഹോത്സവത്തിന്റെ ഭാഗമായി നടക്കുന്ന വിശേഷാല്‍ പൂജകളിലും വഴിപാടുകളിലും അന്നദാനത്തിലും പങ്കെടുക്കാന്‍ ഭക്തജനങ്ങള്‍ക്ക് അവസരമുണ്ടാകും. ഉത്സവം ഭക്തിസാന്ദ്രവും ആഘോഷപൂര്‍ണവുമാക്കാന്‍ എല്ലാ ഭക്തജനങ്ങളുടെയും സഹകരണവും സാന്നിധ്യവും ക്ഷേത്രഭരണസമിതി അഭ്യര്‍ഥിച്ചു.
