ഊരമന പെരുംതൃക്കോവില്‍ ക്ഷേത്രത്തിലെ ശ്രീമദ് ഭാഗവത സപ്താഹയജ്ഞം ഓഗസ്റ്റ് 16 മുതല്‍ 23 വരെ നടക്കും. പ്രമുഖ യജ്ഞാചാര്യന്‍ വള്ളിക്കീഴ് ഗംഗാധരന്‍ നായരാണ് ഏഴു ദിനരാത്രങ്ങള്‍ നീളുന്ന യജ്ഞത്തിന് കാര്‍മ്മികത്വം വഹിക്കുന്നത്.

ഓഗസ്റ്റ് 16 ഞായറാഴ്ച വൈകിട്ട് 5 മണിക്ക് ശാസ്താക്ഷേത്രത്തില്‍ നിന്നും ആരംഭിക്കുന്ന വിഗ്രഹ ഘോഷയാത്രയോടെയാണ് ചടങ്ങുകള്‍ക്ക് തുടക്കമാകുക. നാമസങ്കീര്‍ത്തനങ്ങളുടെ അകമ്പടിയോടെ നരസിംഹസ്വാമി ക്ഷേത്രത്തില്‍ പ്രദക്ഷിണം ചെയ്ത് ഘോഷയാത്ര യജ്ഞശാലയില്‍ എത്തിച്ചേരും. തുടര്‍ന്ന് ഭദ്രദീപ പ്രകാശനവും ഭാഗവത മാഹാത്മ്യ പ്രഭാഷണവും ദീപാരാധനയും നടക്കും.

യജ്ഞദിനങ്ങളില്‍ ദിവസവും രാവിലെ 5.30-ന് അഷ്ടദ്രവ്യ ഗണപതിഹോമം, 6.15-ന് വിഷ്ണു സഹസ്രനാമം, തുടര്‍ന്ന് ശ്രീമദ് ഭാഗവത പാരായണം എന്നിവ ഉണ്ടായിരിക്കുന്നതാണ്. എല്ലാ ദിവസവും ഉച്ചയ്ക്ക് 1.00 മണിക്ക് പ്രസാദഊട്ടും വൈകിട്ട് 6.15-ന് ദീപാരാധനയും ഭജനയും നടക്കും.

യജ്ഞത്തിലെ പ്രധാന ഭാഗമായ ശ്രീകൃഷ്ണാവതാരം ഓഗസ്റ്റ് 20 വ്യാഴാഴ്ച വൈകിട്ട് 5 മണിക്കാണ്. ഇതിനോടനുബന്ധിച്ച് 5.15-ന് അഞ്ചു വയസ്സില്‍ താഴെയുള്ള കുട്ടികള്‍ക്കായി ഉണ്ണിയൂട്ട് വഴിപാടും നടക്കും. ഓഗസ്റ്റ് 21 വെള്ളിയാഴ്ച ഉച്ചയ്ക്ക് 12 മണിക്ക് ഗോവിന്ദ പട്ടാഭിഷേകവും, വൈകിട്ട് 5 മണിക്ക് കിഴക്കേ ഗോപുരനടയില്‍ നിന്നും ആരംഭിച്ച് താലപ്പൊലിയുടെ അകമ്പടിയോടെ യജ്ഞശാലയില്‍ എത്തിച്ചേരുന്ന രുക്മിണി സ്വയംവര ഘോഷയാത്രയും അരങ്ങേറും.

വിദ്യയിലെ തടസ്സങ്ങള്‍ മാറുന്നതിനായി കുട്ടികള്‍ക്ക് പങ്കെടുക്കാവുന്ന വിദ്യാഗോപാലാര്‍ച്ചന ഓഗസ്റ്റ് 22 ശനിയാഴ്ച വൈകിട്ട് 5 മണിക്കാണ് ഒരുക്കിയിട്ടുള്ളത്. അന്ന് വൈകിട്ട് 7 മണിക്ക് പ്രശസ്ത വാദ്യകലാകാരന്മാരായ വൈക്കം ഹരിഹരയ്യരും ടി.വി പുരം അനിരുദ്ധനും നയിക്കുന്ന നാദസ്വര കച്ചേരിയും ഉണ്ടായിരിക്കും.

ഓഗസ്റ്റ് 23 ഞായറാഴ്ച രാവിലെ 11.30-ന് നടക്കുന്ന ആറാട്ടിനും യജ്ഞ സമര്‍പ്പണ പൂജകള്‍ക്കും ശേഷം ഉച്ചയ്ക്ക് 1 മണിക്ക് നടക്കുന്ന വിപുലമായ പ്രസാദഊട്ടോടെ ഈ വര്‍ഷത്തെ സപ്താഹയജ്ഞത്തിന് ഭക്തിനിര്‍ഭരമായ സമാപനമാകും.