ആഗ്രഹസാഫല്യത്തിന് നാണയപ്പറ വഴിപാട്, അറിയാം ഇടവെട്ടികൃഷ്ണന്റെ പ്രിയവഴിപാടിനെക്കുറിച്ച്
മനസ്സുരുകി പ്രാര്ത്ഥിച്ചാല് ഭക്തരുടെ ഏത് ആഗ്രഹവും സാധിപ്പിച്ചു നല്കുന്ന കണ്ണനാണ് തൊടുപുഴ ഇടവെട്ടി ശ്രീകൃഷ്ണസ്വാമി ക്ഷേത്രത്തിലെ ഭഗവാന്. അതുകൊണ്ടുതന്നെ ഭക്തര് സ്നേഹപൂര്വ്വം ഭഗവാനെ അത്ഭുതകൃഷ്ണന് എന്ന് വിളിക്കുന്നു. ഒരിക്കലും നടക്കില്ലെന്ന് കരുതിയ കാര്യങ്ങള് പോലും ഈ സന്നിധിയില് എത്തി പ്രാര്ത്ഥിച്ചാല് നടക്കുമെന്നാണ് ഭക്തജനങ്ങളുടെ അനുഭവസാക്ഷ്യം.
ഇവിടുത്തെ വഴിപാടുകളില് ഏറ്റവും പ്രധാനപ്പെട്ടതാണ് നാണയപ്പറ. ഭഗവാന്റെ തിരുമുന്നില് ഭക്തിയോടെ നാണയങ്ങള് നിറച്ചു സമര്പ്പിക്കുന്ന ഈ വഴിപാടിന് പിന്നില് മനോഹരമായ ഒരു ഐതിഹ്യമുണ്ട്.
വഴിപാടിന്റെ തുടക്കം
വര്ഷങ്ങള്ക്കു മുന്പ്, ഭഗവാന് നാണയപ്പറ സമര്പ്പിക്കണമെന്ന ആഗ്രഹവുമായി ഒരു ഭക്ത ക്ഷേത്രത്തിലെത്തി. എന്നാല് അന്ന് അങ്ങനെയൊരു വഴിപാട് അവിടെ നിലവിലുണ്ടായിരുന്നില്ല. പിന്നീട് ക്ഷേത്രത്തില് നാണയങ്ങളും പറയും ഒരുക്കിയതിനു ശേഷം, ആ ഭക്തയെ അറിയിക്കുകയും അവര് ആദ്യമായി നാണയപ്പറ സമര്പ്പിക്കുകയും ചെയ്തു. അന്നുമുതല് ഭക്തരുടെ പ്രിയപ്പെട്ട വഴിപാടായി ഇത് മാറി.
എങ്ങനെയാണ് നാണയപ്പറ സമര്പ്പിക്കേണ്ടത്?
തന്റെ ആഗ്രഹം സാധിച്ചു തരണമെന്ന് ഭഗവാനോട് മനസ്സുനിറഞ്ഞ് പ്രാര്ത്ഥിച്ചുകൊണ്ടാണ് നാണയപ്പറ നിറയ്ക്കേണ്ടത്. നാണയപ്പറ സമര്പ്പിച്ചു കഴിഞ്ഞാല് ഭഗവാന്റെ പ്രസാദമായി പട്ടില് പൊതിഞ്ഞ ഒരു നാണയം ഭക്തര്ക്ക് തിരികെ ലഭിക്കും. ഈ നാണയം പൂജാമുറിയിലോ പേഴ്സിലോ സൂക്ഷിക്കാവുന്നതാണ്. ആഗ്രഹിച്ച കാര്യം നടന്നു കഴിയുമ്പോള് ഈ നാണയം തിരികെ ഭഗവാന് സമര്പ്പിച്ച് നന്ദി പറയണം എന്നതാണ് ഇതിന്റെ രീതി.
സൗഖ്യാഭീഷ്ടസിദ്ധി പൂജയും ഓണ്ലൈന് സമര്പ്പണവും
ക്ഷേത്രത്തില് നേരിട്ടെത്തി നാണയപ്പറ സമര്പ്പിക്കാന് കഴിയാത്തവര്ക്കായി മാസത്തില് ഒരു ദിവസം പ്രത്യേക സൗകര്യമൊരുക്കാറുണ്ട്. ഏപ്രില് 12 ഞായറാഴ്ച നടക്കുന്ന സൗഖ്യാഭീഷ്ടസിദ്ധി പൂജയോടനുബന്ധിച്ച് ദൂരദേശങ്ങളിലുള്ളവര്ക്കും നാണയപ്പറ വഴിപാട് നടത്താം.
സമയം: ഞായറാഴ്ച രാവിലെ 11:30-ന് തൃശ്ശൂര് ബ്രഹ്മസ്വം മഠത്തിലെ ആചാര്യന്മാര് ഭാഗ്യസൂക്തം ജപിക്കുന്ന വേളയിലാണ് പറ സമര്പ്പണം നടക്കുക.
ഓണ്ലൈന് ബുക്കിംഗ്: വഴിപാട് ബുക്ക് ചെയ്യുന്നവരുടെ പേരും നാളും ചൊല്ലി അന്നേദിവസം ക്ഷേത്രത്തില് നാണയപ്പറ സമര്പ്പിക്കും.
പ്രസാദം: വഴിപാട് നടത്തിയവര്ക്ക് പട്ടില് പൊതിഞ്ഞ നാണയം തപാലില് അയച്ചു നല്കുന്നതാണ്.
ഭക്തര് തങ്ങളുടെ സ്ഥലങ്ങളില് ഇരുന്നുകൊണ്ട് ആ സമയത്ത് ഭഗവാനെ ധ്യാനിച്ച് പ്രാര്ത്ഥിച്ചാല് മതിയാകും. ലഭിക്കുന്ന നാണയം സൂക്ഷിച്ചുവെക്കുകയും ആഗ്രഹം സഫലമാകുമ്പോള് നേരിട്ടെത്തി തിരികെ സമര്പ്പിക്കുകയും ചെയ്യാമെന്ന് ക്ഷേത്രം ഭാരവാഹികള് അറിയിച്ചു.
കൂടുതല് വിവരങ്ങള്ക്ക്: 9495960102.
