തിരുവനന്തപുരം: 2025-ലെ കര്‍ക്കിടകവാവ് ബലിതര്‍പ്പണത്തോടനുബന്ധിച്ച് ഭക്തര്‍ക്കായി വിപുലമായ യാത്രാ സൗകര്യങ്ങള്‍ ഒരുക്കി കേരള സ്റ്റേറ്റ് റോഡ് ട്രാന്‍സ്‌പോര്‍ട്ട് കോര്‍പ്പറേഷന്‍ (കെ.എസ്.ആര്‍.ടി.സി.). 2025 ജൂലൈ 24-ന് നടക്കുന്ന ബലിതര്‍പ്പണ ചടങ്ങുകളില്‍ പങ്കെടുക്കുന്നവര്‍ക്ക് സംസ്ഥാനത്തെ പ്രധാന കേന്ദ്രങ്ങളിലേക്ക് എളുപ്പത്തില്‍ എത്തിച്ചേരുന്നതിനായി പ്രത്യേക ബസ് സര്‍വീസുകള്‍ നടത്തുമെന്ന് അധികൃതര്‍ അറിയിച്ചു.

യാത്രക്കാരുടെ തിരക്ക് കണക്കിലെടുത്ത് വിവിധ ഡിപ്പോകളില്‍ നിന്ന് പ്രധാന ബലിതര്‍പ്പണ കേന്ദ്രങ്ങളിലേക്കും തിരിച്ചും ആവശ്യാനുസരണം അധിക സര്‍വീസുകളും ചാര്‍ട്ടേഡ് ട്രിപ്പുകളും ക്രമീകരിച്ചിട്ടുണ്ട്.

പ്രധാന കേന്ദ്രങ്ങളിലേക്ക് പ്രത്യേക സര്‍വീസുകള്‍

പ്രധാനമായും താഴെ പറയുന്ന ബലിതര്‍പ്പണ കേന്ദ്രങ്ങളിലേക്കാണ് പ്രത്യേക സര്‍വീസുകള്‍ ഏര്‍പ്പെടുത്തിയിരിക്കുന്നത്:

തിരുവല്ലം, ശംഖുമുഖം, വേളി, കഠിനംകുളം, അരുവിക്കര, അരുവിപ്പുറം, മാറനല്ലൂര്‍ അരുവിക്കര ശ്രീ ധര്‍മ്മശാസ്താ ക്ഷേത്രം, വര്‍ക്കല പാപനാശം, കൊല്ലം തിരുമുല്ലവാരം, ആലുവ മണപ്പുറം, ചേലമറ്റം ശ്രീകൃഷ്ണസ്വാമി ക്ഷേത്രം, മലപ്പുറം തിരുനാവായ ക്ഷേത്രം, വയനാട് തിരുനെല്ലി ക്ഷേത്രം.

ഈ പ്രധാന കേന്ദ്രങ്ങള്‍ക്ക് പുറമേ, പ്രാദേശികമായി ബലിതര്‍പ്പണം നടക്കുന്ന സ്ഥലങ്ങളിലേക്കും യാത്രക്കാരുടെ ആവശ്യം പരിഗണിച്ച് അതത് യൂണിറ്റുകള്‍ അധിക സര്‍വീസുകള്‍ ക്രമീകരിക്കുന്നതാണെന്ന് അധികൃതര്‍ അറിയിച്ചു. ബലിതര്‍പ്പണ ചടങ്ങുകള്‍ക്ക് എത്തുന്നവര്‍ക്ക് സുഗമവും സുരക്ഷിതവുമായ യാത്ര ഉറപ്പാക്കുകയാണ് ഇതിലൂടെ കെഎസ്ആര്‍ടിസി ലക്ഷ്യമിടുന്നത്.

സര്‍വീസുകളെക്കുറിച്ചുള്ള കൂടുതല്‍ വിവരങ്ങള്‍ക്കും അന്വേഷണങ്ങള്‍ക്കുമായി പൊതുജനങ്ങള്‍ക്ക് താഴെ പറയുന്ന നമ്പരുകളിലോ അടുത്തുള്ള കെ.എസ്.ആര്‍.ടി.സി. ഡിപ്പോകളിലോ ബന്ധപ്പെടാവുന്നതാണ്:

മൊബൈല്‍: 9447071021

ലാന്‍ഡ്ലൈന്‍: 0471-2463799