കക്കാട്: ശ്രീപുരുഷമംഗലം ശ്രീകൃഷ്ണക്ഷേത്രത്തിൽ വച്ച് 2026 ആഗസ്റ്റ് 3, 4 (കൊല്ലവർഷം 1201 കർക്കടകം 18, 19) തീയതികളിൽ അഷ്ടമംഗല ദേവപ്രശ്നം നടത്താൻ തീരുമാനിച്ചതായി ക്ഷേത്രസമിതി അറിയിച്ചു. ഈ ദിവസങ്ങളിൽ രാവിലെ 9 മണി മുതലാണ് ദേവപ്രശ്ന ചിന്ത ആരംഭിക്കുന്നത്.

ക്ഷേത്രത്തിലെ ദേവചൈതന്യം വർദ്ധിപ്പിക്കുന്നതിനും നിലവിലെ ദേവഹിതം മനസ്സിലാക്കുന്നതിനുമായാണ് ദേവപ്രശ്നം നടത്തുന്നത്. പതിനെട്ട് വർഷങ്ങൾക്ക് മുൻപ് ക്ഷേത്രത്തിൽ നവീകരണ കലശവും പുനരുദ്ധാരണവും നടന്നിരുന്നു. തുടർന്ന് പത്ത് വർഷങ്ങൾക്ക് മുൻപ് ഒരു അഷ്ടമംഗല ദേവപ്രശ്നം നടത്തിയെങ്കിലും, അതിൽ ഉരുത്തിരിഞ്ഞ പരിഹാര നിർദ്ദേശങ്ങളോ നിർമ്മാണപ്രവർത്തനങ്ങളോ നടപ്പിലാക്കാൻ സാധിച്ചിരുന്നില്ല. നാട്ടിലുണ്ടാകുന്ന തുടർച്ചയായ ദുർമരണങ്ങളും ക്ഷേത്ര പുരോഗതിയിലുള്ള തടസ്സങ്ങളും കണക്കിലെടുത്ത്, ക്ഷേത്രസമിതി തന്ത്രിയുമായി ആലോചിച്ച ശേഷമാണ് പുതിയ ദേവപ്രശ്നം നിശ്ചയിച്ചത്.

പ്രമുഖ ജ്യോതിഷ പണ്ഡിതൻ ശ്രീ. ഇടവട്ടം ഗോപിനാഥൻ നായർ മുഖ്യ ദൈവജ്ഞനായും, ബ്രഹ്മശ്രീ പുതുവാമന ഹരിദാസൻ നമ്പൂതിരിപ്പാട്, ബ്രഹ്മശ്രീ അത്തിമറ്റത്ത് പ്രദീപ് തിരുമേനി എന്നിവർ സഹദൈവജ്ഞന്മാരായും ദേവപ്രശ്ന ചിന്തയ്ക്ക് നേതൃത്വം നൽകും.

ക്ഷേത്രം തന്ത്രി ബ്രഹ്മശ്രീ കാവനാട് പരമേശ്വരൻ നമ്പൂതിരിപ്പാട്, മേൽശാന്തി ശ്രീ. രാജേഷ് ഗോവിന്ദൻ നമ്പൂതിരിപ്പാട് എന്നിവരുടെയും ഊരാൺമ കുടുംബങ്ങളായ പുളിയക്കാമറ്റത്ത് ഇല്ലം, വേങ്ങക്കാട്ട് മന എന്നിവരുടെയും സാന്നിധ്യത്തിലായിരിക്കും ചടങ്ങുകൾ നടക്കുക.

ദേവപ്രശ്ന ചിന്ത നടക്കുന്ന പുണ്യവേളയിൽ മുഴുവൻ ഭക്തജനങ്ങളും സന്നിഹിതരായി സഹകരിക്കണമെന്ന് ക്ഷേത്രസമിതി ഭാരവാഹികൾ അഭ്യർത്ഥിച്ചു.