ക്ഷേത്ര വാർത്തകൾ
ഗുരുവായൂര്‍ ഏകാദശി; തട്ടിപ്പില്‍ വീഴരുതേ , ഭക്തജനങ്ങള്‍ക്ക് മുന്നറിയിപ്പുമായി ദേവസ്വം
ഗുരുവായൂര്‍ ഏകാദശി ദിനത്തില്‍ ക്ഷേത്രത്തില്‍ പ്രത്യേക വഴിപാട് നിര്‍വ്വഹിച്ച് തരാമെന്ന് വാഗ്ദാനം നല്‍കി ഭക്തരുടെ പണം തട്ടുന്ന സംഘങ്ങള്‍ക്കെതിരെ ജാഗ്രത വേണമെന്ന് ദേവസ്വം അറിയിച്ചു. ഇത്തരത്തില്‍ വഴിപാട് ചെയ്ത് നല്‍കാമെന്ന് വാഗ്ദാനം നല്‍കുന്ന വെബ് സൈറ്റുകള്‍ ശ്രദ്ധയില്‍പ്പെട്ട സാഹചര്യത്തിലാണ് ദേവസ്വത്തിന്റെ മുന്നറിയിപ്പ്.
ഗുരുവായൂര്‍ ക്ഷേത്രത്തില്‍ ഏകാദശി ദിനത്തില്‍ ഏറ്റവും ശ്രേഷ്ഠമായ ഉദയാസ്തമന പൂജ വഴിപാട് ദേവസ്വം വകയായി നടത്തുകയാണ്. വിഷ്ണു സഹസ്രനാമാര്‍ച്ചനയോ, അതിന്റെ പ്രസാദവിതരണമോ അന്ന് ഭക്തര്‍ക്കായി നിശ്ചയിച്ചിട്ടില്ല. അത് പതിവുമല്ല. ഇക്കാര്യത്തില്‍ ഭക്തരെ തെറ്റിദ്ധരിപ്പിക്കുന്ന വെബ് സൈറ്റുകള്‍ക്കെതിരെ നിയമ നടപടി സ്വീകരിക്കുമെന്ന് ദേവസ്വം അഡ്മിനിസ്‌ട്രേറ്റര്‍ അറിയിച്ചു.
