തിരുപ്പതി: വരാനിരിക്കുന്ന ശ്രീവാരി സാലകട്ല ബ്രഹ്‌മോത്സവത്തിന് മുന്നോടിയായി തിരുമലയില്‍ ശ്രാവണ പൗര്‍ണ്ണമി ദിനത്തില്‍ ഗരുഡസേവയുടെ ട്രയല്‍ റണ്‍ (മാതൃകാ ഗരുഡസേവ) സംഘടിപ്പിച്ചു. ഈ വര്‍ഷം സെപ്റ്റംബര്‍ 15 മുതല്‍ 23 വരെയാണ് പ്രശസ്തമായ ബ്രഹ്‌മോത്സവം നടക്കുന്നത്. ഇതിന്റെ ഒരുക്കങ്ങള്‍ കൃത്യമായി വിലയിരുത്തുന്നതിന്റെ ഭാഗമായി ടി.ടി.ഡി (TTD) എല്ലാ വര്‍ഷവും നടത്തുന്ന മോക്ക് ഗരുഡസേവയാണ് വെള്ളിയാഴ്ച വൈകുന്നേരം നടന്നത്.

വൈകുന്നേരം 7 മണി മുതല്‍ രാത്രി 9 മണി വരെയായിരുന്നു ഗരുഡസേവ. ക്ഷേത്രത്തിന് ചുറ്റുമുള്ള നാല് മാട വീഥികളിലെയും സജ്ജീകരണങ്ങള്‍ അധികൃതര്‍ നേരിട്ട് പരിശോധിച്ചു. ഭക്തര്‍ക്കുള്ള സുരക്ഷ, കുടിവെള്ളം, അന്നപ്രസാദം എന്നിവയുടെ വിതരണം, ശ്രീവാരി സേവകരുടെ പ്രവര്‍ത്തനങ്ങള്‍, ക്ഷേത്രത്തിലേക്കുള്ള പ്രവേശന-പുറത്തുകടക്കല്‍ വഴികള്‍, മറ്റ് എഞ്ചിനീയറിംഗ് ഒരുക്കങ്ങള്‍ എന്നിവയാണ് പ്രധാനമായും വിലയിരുത്തിയത്.

ടി.ടി.ഡി ഇ.ഒ ശ്രീ മുദ്ദദ രവിചന്ദ്ര, അഡീഷണല്‍ ഇ.ഒ ശ്രീ സി.എച്ച്. വെങ്കയ്യ ചൗധരി, തിരുപ്പതി എസ്.പി ശ്രീ സുബ്ബരായഡു എന്നിവര്‍ സംയുക്തമായാണ് പരിശോധനകള്‍ക്ക് നേതൃത്വം നല്‍കിയത്. ടി.ടി.ഡി ബോര്‍ഡ് അംഗങ്ങളായ ശ്രീ നന്നപ്പനേനി സദാശിവറാവു, ശ്രീ ശാന്താറാം, എസ്.വി.ബി.സി ചെയര്‍മാന്‍ ശ്രീ ശ്രീധര്‍ വര്‍മ്മ, ചീഫ് എഞ്ചിനീയര്‍ ശ്രീ മനോഹരം, ശ്രീവാരി ക്ഷേത്രം ഡെപ്യൂട്ടി ഇ.ഒ ശ്രീ ലോകനാഥം, വി.ജി.ഒ ശ്രീ സുരേന്ദ്ര തുടങ്ങി വിവിധ വകുപ്പുകളിലെ മുതിര്‍ന്ന ഉദ്യോഗസ്ഥരും വാഹനസേവയില്‍ പങ്കെടുത്തു.