മനുഷ്യന്‍ ചെയ്യുന്ന ദാനങ്ങളില്‍ ഏറ്റവും ഉല്‍കൃഷ്ടമായി ഭാരതീയ സംസ്‌കാരം കരുതുന്നത് അന്നദാനത്തെയാണ്. വിദ്യയായാലും ധനമായാലും അത് സ്വീകരിക്കുന്ന വ്യക്തിക്ക് എത്ര കിട്ടിയാലും മതിയാകില്ല. എന്നാല്‍ ‘ഇനി മതി, എനിക്ക് തൃപ്തിയായി’ എന്ന് ഒരാള്‍ പൂര്‍ണ്ണമനസ്സോടെ പറയുന്നത് ഭക്ഷണം കഴിക്കുമ്പോള്‍ മാത്രമാണ്. അതുകൊണ്ടാണ് അന്നദാനം സകല ദാനങ്ങളിലും വെച്ച് അത്യുന്നതമായിരിക്കുന്നത്.

പുരാണങ്ങളിലെ അന്നദാന മഹിമ

അന്നദാനത്തിന്റെ മഹത്വത്തെക്കുറിച്ച് പുരാണങ്ങളില്‍ അതിശയിപ്പിക്കുന്ന താരതമ്യങ്ങളുണ്ട്. പത്തു പശുക്കളെ ദാനം ചെയ്യുന്നത് ഒരു ഋഷഭത്തെ (കാളയെ) ദാനം ചെയ്യുന്നതിന് തുല്യമായും, പത്ത് ഋഷഭങ്ങളെ ദാനം ചെയ്യുന്നത് ഒരു കുതിരയെ ദാനം ചെയ്യുന്നതിന് തുല്യമായും കരുതപ്പെടുന്നു. ഈ കണക്കുകള്‍ തുടര്‍ന്ന് പോയാല്‍ പത്ത് യജ്ഞങ്ങള്‍ നടത്തുന്നതിനേക്കാള്‍ പുണ്യമാണ് ഒരു കന്യാദാനമെന്നും, പത്ത് കന്യാദാനത്തേക്കാള്‍ വലുതാണ് ദാഹിച്ചു വലയുന്നവന് ജലം നല്‍കുന്നതെന്നുമാണ് പറയപ്പെടുന്നത്. എന്നാല്‍ ഇതിനെയെല്ലാം അപേക്ഷിച്ച്, ഒരാള്‍ക്ക് അന്നം നല്‍കുന്നത് ഒരു കോടി പശുക്കളെ ദാനം ചെയ്യുന്നതിന് തുല്യമായ മഹാപുണ്യമാണ് നല്‍കുന്നത്.

ഇടവെട്ടി ശ്രീകൃഷ്ണസ്വാമി ക്ഷേത്രവും അന്നദാനവും

അന്നദാനത്തിന് വളരെയേറെ പ്രാധാന്യമുള്ള പുണ്യഭൂമിയാണ് ഇടവെട്ടി ശ്രീകൃഷ്ണസ്വാമി ക്ഷേത്രം. ഇതിന് പിന്നില്‍ അയ്യായിരം വര്‍ഷം പഴക്കമുള്ള ഒരു ഐതിഹ്യമുണ്ട്. ദ്വാപരയുഗത്തില്‍ നകുലന്‍ ഭഗവാനെ പ്രതിഷ്ഠിച്ച് ആദ്യമായി നിവേദ്യം സമര്‍പ്പിച്ചത് ഒരു തിരുവോണ നാളിലായിരുന്നു. പിന്നീട് വടക്കുംകൂര്‍ രാജാവിന് സ്വപ്നദര്‍ശനത്തിലൂടെ ഭഗവാന്‍ തിരുവോണ ഊട്ടിന്റെ മാഹാത്മ്യം വെളിപ്പെടുത്തി നല്‍കുകയും, ആ പുണ്യത്താല്‍ രാജാവിന് സല്‍സന്താന ലബ്ധി ഉണ്ടാവുകയും ചെയ്തു.

ഇന്നും ആ പാരമ്പര്യം മുറതെറ്റാതെ ക്ഷേത്രത്തില്‍ തുടര്‍ന്നുപോരുന്നു. വിശേഷാല്‍ ദിവസങ്ങളില്‍ ക്ഷേത്രത്തില്‍ എത്തുന്ന ഭക്തര്‍ക്ക് പ്രസാദമൂട്ട് നല്‍കുന്നത് ഭഗവാന് ഏറ്റവും പ്രിയപ്പെട്ട വഴിപാടായാണ് കണക്കാക്കുന്നത്.

സൗഖ്യ അഭീഷ്ടസിദ്ധി പൂജയും അന്നപ്രസാദവും

എല്ലാ മാസവും രണ്ടാമത്തെ ഞായറാഴ്ചയാണ് ക്ഷേത്രത്തില്‍ സൗഖ്യ അഭീഷ്ടസിദ്ധി പൂജ നടക്കുന്നത്. രോഗദുരിതങ്ങളില്‍ നിന്ന് മോചനം നേടാനും, മംഗല്യഭാഗ്യത്തിനും, സന്താനലബ്ധിക്കും, ആഗ്രഹസാഫല്യത്തിനുമായി നൂറുകണക്കിന് ഭക്തരാണ് അന്നേ ദിവസം ക്ഷേത്രത്തില്‍ ഒത്തുകൂടുന്നത്. അവിടെ എത്തുന്ന ഓരോ ഭക്തനും വിശപ്പകറ്റി സന്തോഷത്തോടെ മടങ്ങണം എന്ന സങ്കല്‍പ്പത്തിലാണ് അന്നദാനം നടത്തുന്നത്.

പങ്കാളികളാകാം ഈ മഹാപുണ്യത്തില്‍

‘ലോകമെങ്ങും സൗഖ്യം നിറയ്ക്കുക’ എന്ന മഹത്തായ ലക്ഷ്യത്തോടെ നടത്തുന്ന ഈ അന്നദാന യജ്ഞത്തില്‍ ഓരോ ഭക്തനും പങ്കുചേരാവുന്നതാണ്. ഒരാള്‍ക്ക് 100 രൂപ എന്ന നിരക്കില്‍ അന്നദാനത്തിലേക്ക് വഴിപാടുകള്‍ സമര്‍പ്പിക്കാമെന്ന് ക്ഷേത്രം ഭാരവാഹികള്‍ അറിയിച്ചു. നമ്മള്‍ നല്‍കുന്ന ഒരു നേരത്തെ ഭക്ഷണം ഒരാളുടെ വിശപ്പടക്കുമ്പോള്‍, ആ സംതൃപ്തി നമ്മുടെ ജീവിതത്തില്‍ വലിയ അനുഗ്രഹങ്ങളായി മാറും എന്നതില്‍ തര്‍ക്കമില്ല.

ഭഗവാന്റെ സന്നിധിയില്‍ എത്തുന്ന ഭക്തജനസഹസ്രങ്ങള്‍ക്ക് അന്നദാനം ഒരുക്കുന്ന ഈ മഹത്തായ പുണ്യപ്രവൃത്തിയില്‍ പങ്കുചേരാന്‍ ആഗ്രഹിക്കുന്നവര്‍ക്ക് ക്ഷേത്രവുമായി ബന്ധപ്പെടാവുന്നതാണ്. കൂടുതല്‍ വിവരങ്ങള്‍ക്ക്: 94 95 96 0 1 0 2.