ജാതകകാരന്റെ ഗ്രഹനിലയില്‍ സമുദായാഷ്ടവര്‍ഗ്ഗത്തില്‍ മീനം, മേടം, ഇടവം, മിഥുനം എന്നീ രാശികളിലെ അക്ഷങ്ങളൊന്നിച്ചു കൂട്ടിയാല്‍ ജനനം മുതല്‍ യൗവനം വരെയുള്ള കാലഘട്ടത്തിലെ സംഖ്യയും, കര്‍ക്കിടകം, ചിങ്ങം, കന്നി, തുലാം എന്നീ രാശികളിലെ അക്ഷങ്ങളൊന്നിച്ചു കൂട്ടിയാല്‍ അതു യൗവനം മുതല്‍ വാര്‍ദ്ധക്യം വരെയുള്ള കാലഘട്ടത്തിലെ സംഖ്യയും, വൃശ്ചികം, ധനു, മകരം, കുംഭം എന്നീ രാശികളിലെ അക്ഷങ്ങളൊന്നിച്ചു കൂട്ടിയാല്‍ അത് വാര്‍ദ്ധക്യം മുതല്‍ മരണം വരെയുള്ള കാലം സംഖ്യയുമാകുന്നു. ഇതിന് ‘വയഃത്രിഭാഗം’ എന്ന് പറയുന്നു. വയത്രി ഭാഗത്തിന്റെ ലക്ഷണങ്ങള്‍ പരിശോധിച്ചാല്‍ ഒരാളുടെ ജീവിതത്തിന്റെ വിവിധ ഭാഗങ്ങളിലെ ഗുണദോഷഫലങ്ങള്‍ എന്തെല്ലാമെന്നു തിരിച്ചറിയാനാകും.
ഇതില്‍ ഒന്നാമത്തെ ഭാഗത്തിലധികാക്ഷമുണ്ടായാല്‍ ജനനം മുതല്‍ യൗവനം വരെയുള്ള കാലം സുഖലോലുപമായിരിക്കും. മധ്യകാലത്തില്‍ അധികാക്ഷമുണ്ടായാല്‍ യൌവനം മുതല്‍ വാര്‍ദ്ധക്യം വരെയുള്ള കാലമാകും സുഖഭൂയിഷ്ഠമാകുക. അന്ത്യഭാഗത്തിലധികാക്ഷമുണ്ടായാല്‍ വാര്‍ദ്ധക്യകാലം മുതല്‍ മരണം വരെയുള്ള കാലമാകും സുഖഭൂയിഷ്ഠമായിത്തീരുക. വയത്രിഭാഗത്തില്‍ കാണുന്ന സംഖ്യകളുടെ ഏറ്റക്കുറവുകളനുസരിച്ചുള്ള കാലയളവുകളില്‍ സുഖദുഃഖാനുഭവങ്ങളുണ്ടാകുന്നതാണ്. അക്ഷാധിക്യം കുറഞ്ഞ വയഃത്രിഭാഗത്തില്‍ വ്യാധികളും ദുഃഖങ്ങളുമുണ്ടാകും.
