ശബരിമല ക്ഷേത്രത്തിന്റെ തനി രൂപത്തില്‍ ഒരു ക്ഷേത്രമുണ്ട്. പത്തനംതിട്ട ജില്ലയിലെ തടിയൂര്‍ ഗ്രാമത്തിലാണ് പുത്തന്‍ശബരിമല ക്ഷേത്രം സ്ഥിതി ചെയ്യുന്നത്. 18 പടികളാണ് ഈ ക്ഷേത്രത്തിനുള്ളത്. ഈ പടികള്‍ ചവിട്ടി ക്ഷേത്രദര്‍ശനം നടത്തണമെങ്കില്‍ ശബരിമലക്ഷേത്രത്തിലേതുപോലെ വ്രതവും ഇരുമുടിക്കെട്ടും നിര്‍ബന്ധമാണ്. ശബരിമല ക്ഷേത്രത്തിലേതുപേലെ പ്രധാന ക്ഷേത്രത്തിനു സമീപത്തായി മാളികപ്പുറത്തമ്മയുടെ പ്രതിഷ്ഠയുണ്ട്.
അയിരൂര്‍ പഞ്ചായത്തിലെ തടിയൂര്‍ ഗ്രാമത്തില്‍ ഒരു കുന്നിന്‍ മുകളിലാണ് ഈ അയ്യപ്പക്ഷേത്രം സ്ഥിതി ചെയ്യുന്നത്. പഞ്ചലോഹപ്രതിഷ്ഠയാണിവിടെ. ശബരിമലയിലെപ്പോലെതന്നെ കന്നിരാശിയില്‍ ഗണപതിപ്രതിഷ്ഠ, കുംഭരാശിയില്‍ മാളികപ്പുറത്തമ്മ, മീനം രാശിയില്‍ വാവരുസ്വാമി, പതിനെട്ടാംപടിക്കുതാഴെ ഇരുവശത്തുമായി കറുപ്പന്‍സ്വാമി, കറുപ്പായി അമ്മ, വലിയകടുത്തസ്വാമി, യക്ഷി, സര്‍പ്പം എന്നീ പ്രതിഷ്ഠകളുണ്ട്.
ക്ഷേത്രത്തിലെ പതിനെട്ടാം പടിക്കുമുന്നില്‍ വിശാലമായ കല്‍ത്തളമുണ്ട്. തെങ്കാശിയില്‍നിന്നു വരുത്തിയ കരിങ്കല്ലുകൊണ്ടാണ് ഈ പടികള്‍ നിര്‍മിച്ചിരിക്കുന്നത്. ഏറ്റവും താഴത്തെ പടിയുടെ ഇരുവശത്തുമായി ആനയുടെയും പുലിയുടെയും കരിങ്കല്ലില്‍ക്കൊത്തിയ രൂപങ്ങളുമുണ്ട്. ശബരിമലയിലെ അതേയളവിലും രൂപത്തിലുമുള്ളതാണ് പതിനെട്ടാംപടി.
മകരവിളക്കാണ് പ്രധാന വിശേഷദിനം. 10 ദിവസം നീണ്ടുനില്‍ക്കുന്ന ഉത്സവവമായി ആഘോഷിക്കുന്നു. അപ്പം, അരവണ പ്രധാനവഴിപാടുകളാണ്. പേട്ടകെട്ട് ഇവിടെയുമുണ്ട്. ജനുവരി 4 മുതല്‍ 14 വരെയുള്ള മകരവിളക്ക് മഹോത്സവകാലത്ത് വ്രതാനുഷ്ഠാനങ്ങളോടുകൂടി ജില്ലയ്ക്കകത്തും പുറത്തും നിന്നായി ആയിരക്കണക്കിന് അയ്യപ്പഭക്തര്‍ ഇരുമുടിക്കെട്ടുമായി വന്ന് നാളികേരമുടച്ച് പതിനെട്ടാംപടി ചവിട്ടി അയ്യപ്പദര്‍ശനം നടത്തും. ശനിദോഷശമനത്തിന് ശനിയാഴ്ച തോറുമുള്ള നീരാഞ്ജനമാണ് ഇവിടത്തെ പ്രധാനവഴിപാട്. ഇതുകൂടാതെ നെയ്യഭിഷേകമടക്കമുള്ള ശബരിമല ക്ഷേത്രത്തിലെ എല്ലാവഴിപാടുകളും ഇവിടെ നടത്തുന്നുണ്ട്.
തിരുവിതാംകൂര്‍ ദേവസ്വം ബോര്‍ഡിന്റെ ഈ ക്ഷേത്രത്തില്‍ ശബരിമല ക്ഷേത്രത്തിലെ ആചാരങ്ങളില്‍നിന്നു വ്യത്യസ്തമായി ഒരുകാര്യം മാത്രമേ ഉള്ളൂ. ഏതുപ്രായത്തിലുള്ള സ്ത്രീകള്‍ക്കും ദര്‍ശനം നടത്താം. ക്ഷേത്രത്തിന്റെ വടക്കേനടയില്‍ക്കൂടി ക്ഷേത്രത്തില്‍ പ്രവേശിക്കാം.എന്നാല്‍, പതിനെട്ടാംപടി ചവിട്ടുന്നതിന് ശബരിമല ക്ഷേത്രത്തിലെ എല്ലാ നിയമങ്ങളും ഇവിടെയും ബാധകമാണ്.
ഒരുകാലത്ത് നിബിഡവനമായിരുന്ന പുത്തന്‍ശബരിമലയില്‍, മണികണ്ഠസ്വാമി പുലിപ്പാല്‍ അന്വേഷിച്ചുള്ള യാത്രയ്ക്കിടെ ഋഷീശ്വരന്മാരുടെ ആശ്രമത്തില്‍ താമസിച്ചതായാണ് ഐതിഹ്യം. തിരുവല്ലറാന്നി റൂട്ടില്‍ തിരുവല്ലയില്‍നിന്ന് 20 കിലോമീറ്റര്‍ ദൂരെ കടയാര്‍ ജംഗ്ഷനില്‍നിന്ന് ഒന്നര കിലോമീറ്റര്‍ തെക്കോട്ടുമാറിയും റാന്നിയില്‍നിന്നു 10 കിലോമീറ്റര്‍ പടിഞ്ഞാറുമായാണ് ക്ഷേത്രം. കൂടുതല്‍ വിവരങ്ങള്‍ക്ക്: പ്രസിഡന്റ് – 8606478390, സെക്രട്ടറി – 9539057735
